MCHAKATO
wa utafutaji wa mafuta na gesi asilia katika Visiwa vya Unguja na Pemba hivi
karibuni umeingia katika awamu nyengine muhimu ya kufanya Utafiti katika
mwambao wa Pwani ya Zanzibar katika kitalu cha Pemba-Zanzibar, kwa kutumia meli
maalum ya Kampuni ya BGP kutoka nchini China.
Hatua
hiyo ya awamu ya pili ya zoezi la utafiti linaloendeshwa na kampuni ya RAKGAS ya Ras Khaimah kutoka falme za kiarabu chini ya usimamizi wa Serikali
ya Mapinduzi ya Zanzibar, wameanza kazi hiyo huku wakiahidi kuikamilisha kwa
muda uliopangwa.
Mafuta
na gesi asilia ni moja ya rasilimali zenye thamani kubwa duniani ambazo nchini
mbali mbali duniani zinazomiliki na kuchimba nishati hiyo zinatajwa kuwa
imara kiuchumi.
Kwa
mara ya kwanza kabisa kazi ya Utafiti wa Nishati hiyo ulifanyika Zanzibar mwaka
1952 ambao matokeo yake yalibainisha kuwepo kwa dalili za Mafuta na Gesi
Asilia katika Pwani ya mwambao wa maeneo ya visiwa vya Pemba na Unguja.
Kimsingi
mchakato huo ulianza miaka mingi iliyopita hivyo ni jambo ambalo bado lilikuwa
katika dhamira ya utekelezaji wa awamu mbali mbali za serikali zilizopita
japokuwa wakati wake ulikuwa bado haujatimia.
Serikali
ya Mapinduzi ya Zanzibar ya awamu ya saba chini ya uongozi wa Rais wa Zanzibar
na Mwenyekiti wa Baraza la Mapinduzi Dkt. Ali Mohamed Shein aliahidi kusimamia
zoezi la upatikanaji wa mafuta na gesi katika kampeni za uchaguzi mkuu
uliopita, ikiwa ni moja ya hatua ya msingi ya utekelezaji wa Ilani ya Uchaguzi
ya CCM ya mwaka 2015/2020 kwa wananchi wote.
Mnamo
Mwezi Novemba 15 mwaka jana, Dk. Shein alitia saini Sheria ya Utafutaji
na Uchimbaji wa Mafuta na Gesi Asilia ili kuandaa mazingira rafiki ya kisheria
yatakayotoa baraka na mamlaka ya kuanza kwa zoezi hilo.
Kutungwa
kwa sheria hiyo inatokana na masharti ya kifungu cha nne Sheria ya Mafuta na
Gesi Asilia 2015 ya Jamhuri ya Muungano wa Tanzania ambayo inataja kwamba
shughuli za uendeshaji wa Mafuta na Gesi Asilia utafanywa Zanzibar kwa
kusimamia na kuendeshwa na taasisi kwa mujibu wa Sheria za Zanzibar.
Pia
kabla ya kutungwa kwa sheria hiyo, Serikali ilitengeneza Sera ya Mafuta na Gesi
Asilia kwa ajili ya kutoa muongozo kwa sekta hii muhimu katika uchumi wa nchi.
Katika
hatua za msingi za kuharakisha mchakato wa utafutaji wa nishati, Dk. Shein
mwezi machi mwaka huu alianzisha rasmi Mamlaka ya udhibiti wa utafutaji
na uchimbaji wa Mafuta na Gesi Asilia ( ZPRA).
Akizungumzia
Mhandisi wa ZPRA Mwadini Juma Khatib anasema zoezi la Utafutaji wa
nishati hiyo kwa awamu ya kwanza ulianza rasmi Machi mwaka huu, baada ya
uzinduzi uliofanywa na Makamu wa Pili wa Rais wa Zanzibar, Balozi Seif Ali Idd
uliofanywa na ndege ya Kampuni ya Bell Geospace.
Akifafanua
kuwa awamu ya pili ya utafiti huo uliozinduliwa Octobar 27, mwaka huu na Makamo
wa pili wa Rais wa Zanzibar Balozi Seif Ali Idd ambao unatumia Meli Maalum kwa
njia ya mtetemo ambayo kitaalamu huitwa (Seismic Survey) ni hatua ya pili baada
ya hatua ya awali ya kukagua miamba iliyopo chini ya ardhi ya (FTG).
Lengo
la kufanya utafti huo wa Mtetemo ni kuangalia maumbile ya miamba yenye uwezo wa
kuhifadhi mafuta na gesi asilia ili wataalamu waweze kubaini maeneo ya kuchimba
visima vya kutafuta nishati hiyo( Exploration Wells).
Mhandisi Juma wa
ZPRA, anaeleza kwamba
Kwa mujibu wa Kampuni ya Brunwick
Zanzibar Ltd inayofanya kazi kwa niaba ya kampuni ya RAKGAS, Meli ya
Utafiti kwa kutumia mtetemo ya
Kampuni ya BGP ya China
inayofanya utafiti huo katika kitalu cha
Pemba –Zanzibar , kazi inaendelea vizuri
katika maeneo husika.
 |
| Meli ya Kampuni
ya Utafiti na Utafutaji wa Mafuta na Gas Asilia Zanzibar ikiwa katika bandari
ya Zanzibar wakati wa uzinduzi wa Meli hiyo kuaza zoezi la Utafutaji wa Mafuta
na Gas Asilia katika Visiwa vya Unguja na Pemba, Utafiti huo unafanywa na
Kampuni ya Kichina BGP Explorer. |
Hakuna maoni:
Chapisha Maoni