Jumapili, 12 Novemba 2017

ABDULGHAFAR- AWAPIGA MSASA BARAZA KUU UVCCM WILAYA YA MFENESINI

 
KAIMU Naibu Katibu Mkuu wa UVCCM Zanzibar, Abdulghafar  Idrissa Juma amewataka viongozi wa Baraza kuu la UVCCM Wilaya ya Mfenesi kuwa sehemu muhimu ya kuwaunganisha vijana na sio kuwagawa katika makundi yatakayoweza kuleta migogoro ndani ya Umoja huo.

Rai hiyo ameitoa leo wakati akifungua Kikao cha kwanza cha Baraza hilo uliofanyika katika Ofisi za UVCCM Mfenesini zilizopo Bububu Unguja.

Alisema wajumbe wa Baraza hilo wanatakiwa kuwa mstari wa mbele kushughulikia matatizo yanayotokea kwa Vijana ili waendelee kuishi katika misingi ya malezi bora ya Chama cha Mapinduzi.

 “ Viongozi mliochaguliwa hivi karibuni msipofanya vizuri katika miaka mitano ijayo mtakuwa mmeharibu mfumo wa maisha yenu ya kisiasa, lakini mkitekeleza vyema majukumu  majukumu yenu itakuwa ni njia ya kupata fursa mbali mbali za kiungozi na kiutendaji ndani ya Chama na Jumuiya  ”, alisema Abdulghafar.

Aliwambia kuwa matarajio ya UVCCM ni kuona Baraza hilo ambalo ni la kwanza baada ya kumaliza  uchaguzi katika Wilaya hiyo linakuwa ni shamba darasa la kuwapata viongozi imara wenye uwezo wa kujenga hoja zenye nguvu ya kuleta mabadiliko ya kimaendeleo nchini.

Abdulighafar alisisitiza kuwa wajibu wa kila kiongozi ndani ya umoja huo ni kuongoza vizuri sambamba na kuzisoma kwa kina kanuni ya UVCCM na Katiba ya CCM ili maamuzi yoyote yatakayofanyika yaweze kuzingatia matakwa ya Kikatiba.

Aidha Kaimu Katibu Mkuu huyo, Abdulghafar umefika wakati wa kuwa na UVCCM huru yenye nguvu kiuchumi na kiutendaji hivyo viongozi wa umoja huo wanatakiwa kubuni miradi endelevu itakayosaidia vijana kujiajiri wenyewe.

“Vijana tutakapokuwa na uhakika wa kipato kupitia miradi tunayoisimamia wenyewe basi hata hao baadhi ya wanasiasa wenye fedha waliozoea kututumia kwa maslahi yao watakuwa hawana nafasi hiyo tena bali tutasimama wenyewe kutetea maslahi ya chama na jumuiya kwa ujumla.”, alieleza Kaimu Katibu Mkuu huyo.

Mapema  Katibu wa Hamasa na Chipukizi wa Wilaya hiyo aliyemaliza muda wake, Mussa Khamis Mzee  alijiuzulu wadhifa yake ili kupisha kikao hicho kutekeleza utaratibu wa kikanuni  wa kumdhibitisha Katibu atakayeshika nafasi hiyo kwa miaka mitano ijayo.

 

UVCCM JIMBO LA MALINDI WAAGIZWA KUANZISHA MIRADI YA MAENDELEO


UONGOZI wa Umoja wa Vijana wa Chama cha Mapinduzi (UVCCM) Jimbo la Malindi umeagizwa kukutana na Kamati ya Utekelezaji ya Jimbo hilo kubuni Miradi ya maendeleo itakayowanufaisha Vijana. 


Agizo hilo limetolewa  na Mwenyekiti wa UVCCM  Wilaya ya Mjini, Huzaima Mbarouk Tahir wakati akihimisha ziara yake kwa majimbo yote ya Wilaya hiyo yenye lengo la kuimarisha uhai wa Umoja huo.


Alifafanua kuwa Umoja huo unatakiwa kutumia Kikao cha   Kamati ya utekelezaji  kwa kushirikiana na viongozi akiwemo Mwakilishi kujadiliana na kuandaa miradi itakayosaidia kupunguza changamoto zinazowakabili vijana.  


Kwa upande wake Mwakilishi wa Jimbo hilo, Mohamed Ahmada Salum ambae pia ni Naibu waziri wa Ujenzi, Mawasiliano na Usafirishaji Alieleza kuwa Ofisi yake imesaidia  gharama za masomo ya ujasiria mali na Ufundi kwa Vijana 71 jimboni humo.


Alisema hatua hiyo ni miongoni mwa Utekelezaji wa Ilani ya Uchaguzi ya CCM aliyotekeleza kwa kipindi cha mwaka 2016/2017.


“ Nimepanga mikakati mbali mbali ya kuwasaidia vijana hasa walioshindwa kuendelea na elimu ya juu kuhakikisha wanapata elimu ya Ufundi itakayowasaidia kujiajiri wenyewe”, alisema Mohamed. 


Aliwataka vijana kutumia fursa zilizopo ndani ya Jimbo  kwa kujiunga katika Vikundi rasmi ili iwe rahisi kuwatambua na kuwapatia mitaji ya kuanzisha ujasiria mali.


Ziara hiyo ya UVCCM ngazi ya Wilaya ilianza Rasmi  Novemba 4  mwaka huu katika Jimbo la Kikwajuni, Jang’ombe, kwahani na leo hii imefika tamati katika Jimbo la Malindi ambapo zaidi ya Vijana 28 wamekabidhiwa kadi za Umoja huo.